ණය අර්බුදයෙන් පීඩා විඳින අසල්වැසි ශ්‍රී ලංකාවට සහාය වීමට ඉන්දියාව සූදානම් බවත් ඒ සදහා ඉන්දියාව කැපවී සිටින බවත් ජාත්‍යන්තර මූල්‍ය අරමුදල ප්‍රකාශ කරයි.
රොයිටර්ස් පුවත් සේවය වාර්තා කර ඇත්තේ, ඉන්දීය එකඟතාවය හේතුවෙන් ජාත්‍යන්තර මූල්‍ය අරමුදල ශ්‍රී ලංකාවට ලබාදීමට නියමිත සහාය ශක්තිමත් වන බවය.
මිලියන 22ක ජනතාවක් සිටින ශ්‍රී ලංකාව පසුගිය වසර තුළ විදේශ මුදල් හිඟයේ සිට උද්ධමනය සහ දැඩි අවපාතය දක්වා අභියෝග සමඟ පොරබදමින් සිටී.
දශක හතක් තුළ ශ්‍රී ලංකාව මුහුණ දුන් දරුණුතම මූල්‍ය අර්බුදයෙන් ගොඩ ඒමට අත්‍යවශ්‍ය වන ජාත්‍යන්තර මූල්‍ය අරමුදල සමඟ අවසන් ගිවිසුමකට එළැඹීමට චීනයේ සහ ඉන්දියාවේ විශාලතම ද්විපාර්ශ්වික ණය දෙන්නන්ගේ සහාය ශ්‍රී ලංකාවට අවශ්‍ය වේ.
මේ අතර IMF ප්‍රකාශකයෙක් සඳුදා ප්‍රකාශයක් නිකුත් කරමින් කියා සිටියේ “ශ්‍රී ලංකාව වෙනත් නිල ද්විපාර්ශ්වික ණය හිමියන් සමඟ සමාන සහතික ලබා ගැනීම සඳහා සම්බන්ධ වී සිටී” යනුවෙනි.
